Le blog de Marie Toutoule

Tros sujets pour ch'prix d'un !

Chalut mes gins ! I règne com’ eune odeur d’craie. Infin, cha fait belle lurette qu’cha n’est pus vraimint d’eul craie. Pour chertains privilégiés, cha arsimbe pus à ch’mur multimédia qu’in vot dins ches séries américaines. Ch’étot juss’ eune pointe (bic) de nostalgie à ch’momint de ch’te pré-rintrée pour ches inseignints. J’ai hésité chu ch’t’orthographe pour n’pon écrir’te in saignint car chi j’in cros ch’qui ch’dit cha et lal, cha va ête un vrai bazar ! Infin… J’ai eune pinsée toute particulière pour tous ches arpes qui ontent sacrifié leur vie pour finir in feulles tatouées d’tiots carreaux ou seyes. Tout cha pour qu’nos quères tiêtes blontes alles finiss’tent à sciences Po qui, i faut bin l’arconnaîte, est ch’bion moyen d’ouvrir ches portes de l’Eldorado. Hé ouais, mes gins ! In même timps, i faut bin qu’in pinse à ch’t’arlève, pach’que cha n’est pon aveuc eune équipe d’bras cassés qu’in va ch’in sortir ! Alors, com’ j’supposse que te n’auras pon eu l’timps d’raviser quo qui ch’est paché dins ch’pays, trop absorbé par l’découverte d’tous ches nouvieaux accessoires scolaires, in va vir cha insimpe !

Dis Titine, pourquo te tousses ?
Ch’est vrai qu’après quéques jours pachés chous ch’solel d’La Rochelle, chi alle est arv’nue chu Lille pour préparer sin bric-à-brac pour faire ch’braderie, alle a pu ch’inrhumer graf’. I n’y fait pon bin caud. Mais ch’est pour eune aute raison qu’alle a eune toux choudaine. Cha arsimpe pus à un étringlemint, d’ailleurs, pach’qu’i y a eune pilule qui n’pass’te pon ! Cha s’rot fachile à dir’te qu’i s’agit d’eune tiote pilule rosse. Ch’est pourtint bin l’bionne couleur puich’qu’alle porte ch’nom d’Benoît Hamon. Ch’ti-chi i aurot déchidé d’faire cimpagne aveuc Olivier Besancenot, pour définde l’artraite à 60 ins et i est même question qu’is ch’artreuv’tent chu ch’même estrade, pour un meeting à Montreuil, au lind’main d’eul grinte manifestachion prévue. In li avot d’jà arproché d’ête trop à gauche..

..Lire la suite !

Sur le web : http://www.marietoutoule.com/
Mail : hein@marietoutoule.com

Retrouvez les autres dates de l'agenda